Oplan Ligtas Sunog pakusgan

28

Davao City – Gumikan sa mga insidente sa sunog sama sa Boulevard area ug ubang bahin sa sydad sa Davao niining ulahing mga adlaw, ang Barangay76-A naglusad og programa nga pang-alkontra sa sunog.

Gibutyag ni Barangay Capt. Bogart Trajera nga naglusad sila og programa nga pagsanta sa panghitabo nga sunog sa ilang barangay gitawag kini og ‘Oplan Ligtas Sunog.’


Matud ni Trajera, sa pagkakaron naglusad una sila og survey sa mga kabalayan nga mahuman sunod bulan pinaagi ning maong kampanya.

Ubos sa maong programa, ang Barangay Council mag-imbitar og taga-Bureau Fire Protection (BFP) Davao City aron seminaron ug bansayon ang mga residente kung unsaon paglikay kun pagsanta sa sunog.

Segun ni Trajera, magpasiugda usab sila og fire & emergency drill competition aron mahitsas na sa kahibalo ang iyang katawhan labot sa mga pamaagi sa pakigbugno sa kalayo.

Gukdon usab sa Barangay Council ang mga namaligya ug nagapa-refill og butane cannisters tungod kay arang kadelikado kining gamiton ug mao usab kini ang hinungdan sa mga nahitabong sunog sa miaging mga bulan.

Makanunayon usab ang mga pahimangno sa Barangay Council ngadto sa katawhan mahitungod sa paggamit og mga appliances aron dili mosangpot sa electrical short circuit nga usa sa sagad kawsa sa pagdilaab.

Gitinguha ni Trajera nga makig-alayon sila sa CTTMO aron panakpon ang mga trisikad nga iligal nag-parking daplin sa dalan maong maglisud na hinoon og sulod ang kabomberohan panahon sa emerhensya.

Dugang ni Trajera nga ang pi-ot nga mga dalan sa iyang barangay rason usab kun nganong magkapuliki ang mga sakop sa Bureau Fire Protection sa pagsulod sa dapit kung asa nahitabo ang insidente sa sunog.

Busa dakung tabang sa pagsulod sa mga firetrucks sa mga dapit kung asa mahitabo ang sunog kun walay mga behikulong nagbansiwag daplin sa mga dalan sa barangay.

RadyoMaN Joel Viray

Facebook Comments

From Advertisers