Davao City- Wala na matingala pa ang usa ka transport group dinhi sa syudad nga ipatuman na sa kaulohan ang “Oplan Tanggal Bulok at Tanggal Usok” sa Inter agency Council for Traffic.
Sa pakighinabi kang Transmission Piston XI spokesperson Ricardo Baron, gisulti niini nga wala silay supak sa maong aktibidad sanglit maka-serbisyo man ang katawhan niini apan gipasabot niya nga dili pasagdan ang mga gagmayng operators ug hatagan og subsidiya sa ginaduso karon sa gobyerno subay sa PUJ modernization program.
Gani lauman usab nga magpahigayon sila ug laing hugna sa nationwide transport strike aron padayong ipasabaw ang ilang mga mulo subay gihapon sa PUJ modernization.
Sugod ugmang adlawa, Enero 10, pandakpon na ug pamultahon didto sa Manila ang mga sakyanang daot kun bulok ug mga smoke-belchers diin sumala pa sugdan una kini sa kaulohan ayha ipatuman dinhi sa tibuok nasud.
Gisampulan ug gi-warningan kaniadtong adlawng Lunes sa Land Transportation Office, Land Transportation Franchising and Regulatory Board, ug Metropolitan Manila Development Authority ang mga bus ug jeep nga karag na.
Karong adlawa, ug dunay madakpan, pamultahon og 5,000 pesos kung dunay kulang sa mga parte sa sakyanan, 2,000 pesos ngadto sa 6,000 pesos ug usa ka tuig nga suspensyon ang multa sa smoke-belchers, lahi usab ang multa sa buak-buak nga windshield ug side mirror samtang 1,000 pesos sa mga motorista nga nakatsinelas lang samtang gabyahe.
RadyoMaN Renz Barbarona
