General Santos City— Gikabalak-an ni Vice President Leni Robredo ang subling pagbalik sa oplan tokhang sa kapulisan gumikan sa mga nahitabo kaniadto nga nakahatag kini ug managlahing problema.
Pag-angkon niya nga ubay-ubay gyud ang naitalang namatay dihang nanguna ang kapulisan sa war on drugs, daghan ang mga nag-kwestyon niini hilabina sa proseso sa kampanya.
Apan sa karon, daghan na matud pa ang safeguards sa kampanya batok illegal nga droga hilabina sa pagpahigayon ug oplan tokhang sama nalang sa dili pagpahigayon niini panahon sa kagab-ihon o matag Sabado ug Dominggo.
Pag-angkon ni Vice President Robredo nga grabe gyud ang problema sa nasud sa hisgutanang illegal nga droga ug kinahanglan gyud nga kini mahatagan ug solusyon ug ug maresulba ang ugat-hinungdan niini.
Apan dili matud pa kini angayang dali-dalion gumikan sa maong pamaagi mas daghan ang mutumaw nga problema inay mahatagan ug kasulbaran sama sa mga nanglabay nga oplan tokhang.
Busa iyahang gipanawagan nga sa subling pagbalik sa operasyon kontra droga ngadto sa kapulisan, mas maayong kini bantayan aron nga malikayan ang mga personahe sa kapulisan nga maabuso ang katungod sa mga sibilyan.
Kalabot niini, gibutyag ni Vice President Robredo nga sa bag-ong guidelines nga gipagawas, mas maayo ang mamahimong dagan sa operasyon kontra droga.
Kini gumikan pinaagi niini, mahatagan ug assurance ang katawhan aduna gyu’y giya nga ginatuman ang kapulisan kung itandi sa milabay’ng tuig nilang operasyon nga makonsiderang tira-pasagad.
Pagpaklaro niini nga andam siya nga musuporta sa maong programa, basta kini ang alang sa kaayuhan sa kadaghanan.
