APROBADO na sa 26th Sangguniang Panlalawigan (SP) ang Ordinansa Numero 2020-046R(26th SP) nga magtukod ug magtakda sa kinakubsan o minimum nga gilapdon sa road right-of-way nga dili moubos sa 15 metros sa gilapdon (7.50 metros gikan sa tunga sa dalan) sa tanang pang-probinsyal nga dalan sulod sa hurisdiksyon sa Bukidnon, ingon man ang magpahamtang sa silot kung makalapas dinhi.
Sa mosyon nila Board Members Melchor P. Maramara ug Nemesio B. Beltran, Jr., sa ikaduhang Distrito sa Bukidnon, na-presenta niini sa hawanan sa konseho ang kinatibuk-ang unod sa maong Ordinansa, kung aha mi-agi usab kini sa makuti nga pagtuon sa mga kaubanang miyembro sa SP, sama sa mga pamaagi sa pagpatuman sa gisugyot nga balaodnon kung maapektuhan niini ang mga residential area, partikular ang mga kaigsoonang lumad, ug ang paghusay sa maong balaodnong-lokal ngadto sa mga naona nga balaod nga gipatuman na sa nasud.
Nalatid sulod sa nasangpit nga Ordinansa, pinasikad sa Seksyon 17 sa Local Government Code of 1991 nga angayang maninguha nga makabarug ug mopadayon ang Lokal nga Kagamhanan sa paghimo sa katungdanan ug bulohaton niini, ingon man sa pakig-alayon sa nasudnong kagamhanan diha sa ilang pagpatuman sa mga obligasyon ug gimbuhaton, diin nahilakip ang mga pasilidad pang-imprastraktura nga nagtumong maghatud sa batakang serbisyo ngadto sa katawhan. Busa angayan lamang nga matukod ug matakda ang minimum nga gilapdon sa road right of way aron mahimong sumbanan alang sa construction ug maintenance niini, ug dugang pagsiguro sa kalidad ug kaluwasan sa road infrastructures.
Subay niining maong Ordinansa, ang provincial road right of way nga pagatukoron, angayang dili moubos sa 15 metros sa gilapdon apan mamahimong mapalapdan ngadto sa 20 metros, o ba kaha 60 metros, kung malakip ang unpatented lands nga walay pagpihig sa pagsunod sa sukdanan sa gilapdon sa dalan nga gilatid sa Department of Public Works and Highways kung ang usa ka dalan mabalhin o ma-convert ngadto sa national road.
Ang si kinsa man, indibidwal o juridical persons, nga makalapas sa probisyon niining maong Ordinansa, mag-atubang sa silot nga adunay multa ₱5,000.00 ug/o pagkapriso sa dili molapas usa (1) ka tuig, depende sa pagbuot sa korte; alang sa mga opisyal sa publiko nga nakahibalo ug modaut, molapas, mopugong, modili, magdumili, o hunongon ang pagpatuman sa nasangpit nga Ordinansa, mag-antos sa susamang pahamtang, ug temporaryo nga suspensyon gikan sa serbisyo publiko. Ug dugang pa, ang maong opisyal administratibong manubag ilawom sa unsa mang magamit nga balaod.
Kini nga Ordinansa nagsumikad sa Presidential Directive atol sa ika-upat nga State of the Nation Address ni Presidente Rodrigo Duterte nga hawanan ang mga dalan gikan sa iligal nga istruktura ug konstruksyon, pinaagi sa ahensya nga DILG.
