Aron sa dugang pang pagpalambo sa gidaghanon sa mga lokal ug langyaw nga bisita sa probinsiya sa Zamboanga del Norte, gipahigayon ang Orientation kalabot na sa Tourism Standards and Regulations bag-ohay palang.
Sa usa ka lecture nga gipahigayon ni Department of Tourism Regional Director Karina Rosa S. Tiopes iyang gituki dinhi ang kabahin sa RA 9593 kon Tourism Act of 2009 diin matod pa sa maong akto, ang Department of Tourism ang nagmugna ug mga plano, serbisyo ug mga programa dinha sa sektor sa turismo nga nagtumong aron sa dugang pang pagpauswag ug pagpalambo sa turismo dinhi sa atong lokal ingon man sa internasyunal nga tinubdan.
Sa usa usab ka lecture nga gipahigayon ni Accrediation Officer sa DOT – IX nga si Charles Anthony C. Rotoni, iya usab nga gihisgutan dinhi ang kabahin sa mga lagda ug regulasyon sa Tourism Standards dinha sa natad sa Travel and Tour Agencies, Tourist Transport and Tour Guide.
Matod pa ni Mr. Rotoni, nga importante gayud nga aduna’y “standards and regulations” ang mga ahensiya sa “Travel and Tours” tungod kay kini mao ang makatabang sa pagpalambo sa katagbawan sa mga kustomer, makamugna og dugang positibo nga pulong sa ilang ahensiya ingon man nga kini usab ang makatabang sa pagdugang ug kita sa usa ka negosyo ug makatabang usab sa paghupot sa mga kasamtangang kustomer.
Dugang pa, iya usab gihisgutan ang mga pamaagi kon unsaon nga makadangat ug “accreditation certification” ang usa ka “tourism enterprise” o mga negosyo nga aduna’y pagpakighilabot sa turismo ug gawas sa mga importanteng dokumento nga dapat tumanon, iya usab gipasabot nga sa kinatibok-an dapat ang usa ka “tourism enterprise” ang labaw sa tanan limpyo ug luwas.
Ang aktibidad ang gisalmutan usab nila ni Vice-Governor Senen O. Angeles; Mayor Darel Dexter Uy; Provincial Tourism Officer Lenie Castaneda; City Tourism Officer Cecil Bilog; Travel Agencies sa mga nagkalain-laing lugar; mga Local Government Units dinhi sa probinsiya sama sa Baliguian, Labason, Godod, Roxas Dapitan ug uban pa. |CIO
