Davao City – Pabor ang Davao City Office of the Senior Citizens Affairs (OSCA) sa sugyot nga tagi-tagihon ang paghatag sa 100 centenarian cash incentives ngadto sa mga katigulangan sa tibuok nasud.
Gi-uyonan ni OSCA Assistant Head Pastor Luis Moran ang giduso nga balaod sa kongreso nga anam-ana-mon ang paghatag sa P100,000 cash assistance ngadto sa mga katigulangan.
Segun ni Pastor Moran nga dili na dapat paabuton pa mupatong sa edad nga usa ka siglo ang usa ka tigulang ayha siya tunolan ug patilawon sa gobyerno og dakong kantidad sa financial assistance.
Mamatay na lang sa edad nga 70 ang usa ka tigulang apan dili gayod makatilaw og insentibo tungod wala pa sila mupatong sa gatos ang edad nga maoy gihimong basehan sa kagamhanan sa itunol nga insentibo.
Sumala ni Pastor Moran nga puwede man kini sayohon pagtunol inay nga sundon ang unsa man ang gisugilon sa balaod sa punto nga daghan sa mga katigulangan nga nagkinahanglan og tabang pinansiyal gumikan sa ilang palitonon nga tambal ug daghan pang uban.
Hilabi na nga ubay-ubay sa mga senior citizens walay tinubdan sa pinansiyal diin ang uban way pension maong dakong tabang ang insentibo-pinansiyal nga ihatag sa gobyerno ngadto kanila.
RadyoMaN Joel Viray
