Si Cebu City Mayor Tomas Osmeña ug uban pang mga opisyales sa Sugbo nisuporta sa plano sa PNP nga panganlan ang mga barangay officials nga gituohang nalambigit sa illegal drug trade para magiyahan ang mga voters sa umaabot nga piniliay sa Barangay ug Sangguniang Kabataan elections karong Mayo 14.
Dugang ni Osmeña nga ang publiko adunay katungod mahibaw sa pangalan sa mga drug protectors sa ilang barangay aron sila makatarong og pili sa ilang botaran ug para pud maka-esplikar ang mga gituohang drug protectors sa ilang side kung unsa ni katinuod.
Sa pagbisita ni PNP Chief Ronald Dela Rosa sa Cebu City sa miaging adlaw, niingon siya nga andam na ang mga kapolisan sa pagsulti sa publiko sa pangalan sa mga barangay officials nga nalambigit sa illegal nga droga.
Ang head sa City Office for Substance Abuse and Prevention nga si Garry Lao nisupporta usab sa maong plano sa kapolisan. Niingon siya nga ang ilang plano dili bag-o tungod kay dugay nang gipagawas ni Presidente Rodrigo Duterte sa publiko ang ubang mga pangalan sa mga barangay officials nga allegedly involved sa illegal drugs.
“Gipanganlan naman gani ang mayor, bise mayor ug PNP officials nga allegedly involved ana, puslan gisugdan, eh di tiwason,” suma pa ni Lao.
Dugang ni Lao nga sa Siyudad sa Sugbo, walay barangay official nga nag-positibo sa series of drug tests nga gihimo sa COSAP.
“Ang Commission on Elections adunay option nga i-require ang mga kandidato sa umaabot nga piniliay nga moagi og drug test,” tambag ni Lao.
Wala hinuoy problema si Osmeña sa tambag ni Lao pero matud ni Osmeña nga dili tanang drug protectors nigamit og droga.
Sa laing bahin, si Cebu Governor Hilario Davide III wala niuyon sa ideya sa PNP. Matud niya nga di na kinahanglang panganlan sa kapolisan ang mga barangay officials nga nalambigit sa droga tungod kay ang mga taw mismo sa ilang barangay kahibaw na kung unsay kalaki sa ilang mga opisyales sa barangay.
“Dili na necessary nga hinganlan, anyway ang kanang mga molupyo sa barangay kaila sa ilang mga kandidato sa ilang mga officials so no need,” suma ni Davide III.
