CAUAYAN, NEGROS OCCIDENTAL – (2nd Update) Palumbaanay sa salakyan ginalantaw karon isa sa motibo sa natabo nga shooting incident kahapon sang kaagahon sa Purok Dinagsaan, Brgy. Inayawan, Cauayan kon diin isa ka biktima ang napatay.
Nasapwan nga patay na mg alas 2:30 kahapon sang kaagahon sa higad sang dalan ang biktima nga nakilala kay Jopeth Alic, 35 anyos ang edad, isa ka seaman kag residente sang Purok 6, Abada Street, Brgy. Inayawan, Cauayan.
Base sa imbestigasyon, ang biktima sakay sang iya Toyota Vios nga salakyan upod ang live in partner sini nga si Ana Chris Tanusay, 27 anyos ang edad kag ang ila apat ka tuig nga bata ang buot na kuntani nga magpauli antes sang insidente.
Ginpahayag nga sa pag-abot sang biktima sa area sang Sujoton, Caliling nag overtake ini sa isa ka van kag may natabo nga paglinalisay kon diin nagpangayo sang pasensya ang live in partner sa driver sang van bangod hubog ang iya partner.
Sang yara na sila sa area sang Capaclan, Brgy. Inayawan, naglisensya si Ana Chris nga magpangahi, apang sa iya pagpanaug, ginbilin ini siya sang biktima kag nagpaburhot, dala ang apat ka tuig nga bata, para lagson ang van.
Nag-abtanay ang biktima kag ang suspek sa area sang Dinagsaan kag didto na natabo ang pagtiniruhay nga nagresulta sang kamatayon ni Alic./dyHB BACOLOD
