Davao City – Istrikto nang ipatuman ang pagdili sa unsa mang sakyanan nga magpasakay og sobra sa seating capacity niini subay sa direktiba nga gipakanaog sa Land Transportation Office (LTO).
Sa interbyu sa DXDC RMN Davao kang Atty. Gomer Dy, regional director sa LTO-XI, gibutyag niini nga hugot nang ipatuman ang gi-amiyendahan nga Section 32 ug 51 sa Republic Act No. 4136.
Gipasabot ni Dy nga ang sobrang pasahero o karga sa usa kasakyanan makadaut usab sa dalan labi na sa mga tulay.
“Gi-discourage ang mga drivers, owners ug operators labot anang overloading kay kanang excess overloading makadaut na sa karsada, makaputol sa tulay. Kung pirmi na agi-an og truck nga overloaded dali ra gyud na madaut,” saysay ni Dy.
Dugang sa LTO-XI regional director nga ang overloaded nga sakyanan usab ang sagad hinungdan sa mga disgrasya labi na tungod sa kabug-at sa karga rason nga lisod nang mokontrola sa nagamaneho niini.
RadyoMaN Kirby Manzon
