Davao City – Giuyonan karon sa Southeastern Mindanao Diversified Drivers & Operators Cooperative (SEMDDOC) ang gibating kabalaka ni Pres. Rodrigo Duterte sa mga disgrasya sa kadalanan nga nagresulta sa kamatayon sa mga drivers ug sa mga pasahero sa bisan asang dapita dinhi sa Pilipinas.
Matud ni SEMDDOC President Maning Duran, kinaiya gayod sa pipila ka mga drivers ang pagkamapasagaron nga bisan og hubog, mupugos gayod og maneho nga magresulta na hinoon sa disgrasya diin ang kapait, madamay pa ang mga pasahero nga igo ra misakay aron magpahatud sa ilang mga destinasyon.
Karon nga ting-angat ang selebrasyon sa Bag-ong Tuig ug dagsa ang mga pasahero aron muuli sa ilang mga lugar aron sa pagsugat sa New Year aron makauban nila ang ilang tagsa-tagsa ka mga pamilya, hugot ang pahimangno ni Duran alang sa responsable nga pagmaneho aron malikayan ang disgrasya sa kadalanan.
Dugang tambag ni Duran sa mga drivers nga nahisakop sa ilang kooperatiba nga kun makainom ug mahubog, likayan na ang pagpamasada kun pagbiyahe ug mas maayo kung mopahulay na lamang usa aron walay kinabuhing makalas ug pareho pang buhi nga musugat sa pagsulod sa Bag-ong Tuig.
RadyoMan Joel Viray
