iFM Laoag – Tapno adda usaren dagiti miembrona iti daytoy a panawen ti enhanced community quarantine gapu iti coronavirus pandemic, rinugianen ti Bagnos Multipurpose Cooperative iti ili ti Banna ti agibunong ti Interest on Share Capital and Patronage Refund wenno ISCPR.
Kuna ni Amelia Bautista, project manager and development officer ti Bagnos MPC, nasurok nga P1.3 million ti pakabuklan ti naibunong kadagiti 1,053 a kamkameng ti kooperatiba.
Ti pagibasaran ti maawat ti kada miembro ket ti intedna a share capital ken dagiti transaction-na iti Bagnos. Ngem ti kadaklan pay laeng a naawat ti maysa a miembro ket P11,000.
Malaksid iti panagibunongda iti ISCPR, inbaba pay ti Bagnos ti presio dagiti produktoda, nanglukatda iti “buy now, pay later system” ken inkanselarda pay laeng dagiti penalty dagiti maladaw a makabayad ti loan.
Nangrasyon pay ti Bagnos ti merienda kadagiti frontliners ken barangay officials nga adda kadagiti checkpoint iti ili ti Banna, Pinili ken Nueva Era.
Inbatad ni Bautista nga inyuswatda dagitoy kas tulong kadagiti umili iti daytoy a panawen ti health crisis.
Ti Bagnos MPC ket maysa nga agrarian reform beneficiaries organization nga adda iti aywan ti DAR Ilocos Norte. [Detalye manipud ken ni Jeorge Guerrero]
– Bernard Ver, RMN News
