Malaybalay City, Bukidnon – GIAWHAG sa Provincial Government of Bukidnon (PGB) pinaagi ni Atty. Nestor E. Cajes Jr., ang katawhan nga interesadong mopahimulos ug mo-enroll sa Technical Skills Training Program sa Technical Educational and Skills Development Authority (TESDA) dinhi sa probinsya.
Sa report ni Dir. Kotie R. Bax, Provincial Officer In-Charge sa TESDA, aduna silay programa nga Technical Vocational Education and Training (TVET) nga gikunsiderang makatabang sa pagpalambo sa ekonomiya ug panginabuhian sa katawhan pinaagi sa paghatag ug tabang mapalambo ang kahibalo sa mga indibidwal nga gikinahanglan sa industriya, komunidad ug katawhan.
Ang maong programa bukas sa tanan lakip na sa mga igsuong lumad, kababaihan nga biktima sa pagpang-abuso, Out-of-School youths, mga kanhing OFW, drug surrenderers, gustong mag-abroad, walay ensaktong trabaho ug uban pa.
Gibutyag usab ni Atty. Cajes nga adunay gigahin nga P10-Million budget ang TESDA karong tuiga para sa probinsya nga gipaagi sa buhatan ni Senator Miguel Zubiri ug ni Congressman Manuel Zubiri aron sa pagpadayon sa implementasyon sa mga Skills Training Scholarship sa TESDA.
Mahinumduman nga sa tuig 2016, ang upat ka distrito sa probinsya adunay suma-total nga 18, 287 ka mga TVET graduates nga gilangkuban sa District I (5201 TVET graduates), District II (4077 TVET graduates), District III (6248 TVET graduates) ug District IV (2441 TVET graduates) kung aha 2, 601 ka mga benepisyaryo niini ang natabangan sa TESDA pinaagi sa ilang mga Scholarship Programs.
Alang sa interesadong mopahimulos sa maong training bisita lang sa buhatan sa TESDA alang sa dugang kasayuran ug impormasyon.
