Pormal na nga ginturn-over sang Office of the Civil Defense ukon OCD 12 sa local government unit sang Surallah ang ginpondohan nga COVID-19 isolation facility sa banwa.
Nagakantidad sang P10 million ang nasambit nga isolation facility nga nahamtang sa Barangay Centrala, Surallah, South Cotabato .
Suno pa ang nasambit nga isolation facility ang makabulig agud mangin komportable ang mga pasyenti nga nakaangkon sang COVID-19 ilabi na sa subong nga nagasaka na naman ang kaso sang COVID-19
Sa nangin mensahe ni OCD 12 Regional Director Minda C. Morante kadungan sang turn-over ceremony gincongratulate sini si Surallah Mayor Antonio O. Bendita upod si MDRRMO Leonardo Ballon nga madasig nga natapos ang konstruksyon sang Isolation Facility bag-o pa man ang gintalana nga petsa.
Samtang ginpasalamatan naman ni Mayor Bendita ang OCD 12 sa pagpondo sa nasambit nga proyekto nga daku nga bulig sa pagpakig-away nila kontra COVID-19 sa banwa.
Ginpasalamatan man sang alkalde ang contructor nga nagbaton sang proyekto kag hangkat nga tapuson ang pasilidad bag-o pa man ang Oktubre 31 subong nga tuig.
Kadungan sang turn-over ceremony sang P10 Million Isolation Facility ginpatigayon man ang blessing sang P2P Tower kag bag-o bakal nga Water Truck.
Nagturn-over man ang Tribal Leaders Development, Inc. TLDFI sang 300 food packs kag 100 hygiene kits sa LGU subong man ang Kasilak Development Foundation, Inc. (KDFI.) ang naghatag man sang 15 boxes sang hand/body soaps.
