P10,000 madawat na bonus kuman Disyembre sa mga Job Order na empleyado sa Surigao City
Moabot sa tag-P10,000 an madawat na bonus kuman Disyembre sa mga Job Order na empleyado sa Surigao City lakip an dugang honorarium sa mga Brgy. Health Workers ug Daycare Workers. Ini base sa tag-aprubahan na P28 milyones na budget nan mga sakop sa Sangguniang Panlungsod.
Sa Supplemental Budget na tagpasar sa 3rd and Final Reading nan Sangguniang Panlungsod pinaagi sa proponent na si City Councilor Simeon Castrence, an Chairman sa Committee on Finance Budget and Approriations, nalatid didto na kon upat ka buyan pataas na nag-serbisyo an isa ka JO na empleyado an madawat an P10,000 pero kon waya pa, mamahimong prorated an pagkuwenta sa madawat na kantidad. May dugang honorarium sa mga daycare workers P4,000 sa tibook adlaw na nag-serbisyo samtang P3,500 sa tunga sa adlaw, lain pang P1,000 sa mga health workers. Samtang an madawat sa mga contractuals an tagtakda dugang pa tukion.
Tagtudlo na human sa pag-aprubar an nohimo nan mga lakang an City Budget Office, City Accounting ug Cash Division para sa pag-proseso na madawat ini nan mga empleyado sa siyudad adisir an Pasko sa Dec. 25.
