Davao City – Gikatakdang itunol karong adlawa, Enero 4, 2019 ang hinabang alang sa mga biktima sa Bagyong Usman gikan sa Local Government of Davao nga mubalor sa 10 million pesos.
Kini ang gibutyag ni Davao City Vice Mayor Bernard Al-ag sa pakighinabi sa DXDC 621 RMN Davao.
Gibutyag ni Al-ag nga human nga naaprubahan ang budget kagahapon, Enero 3, 2019, ibiyahe na karong adlawa ug sugdan na sa pag distribute ang maong hinabang, diin sa maong kantidad, gahinan og tag P1M ang 5 ka probinsya nga apektado sa bagyo nga mao ang probinsya sa Sorsogon, Albay, Camarines Sur ug Camarines Norte sa Bicol ingon man sa Oriental Mindoro.
Samtang ang P5M ipalit daan og mga goods sama sa bugas ug canned goods nga direktang mahatag sa mga biktima sa kalamidad.
Gibutyag sa bise mayor ipaabot ang maong hinabang pinaagi ni Emmanuel Jaldon, Davao City Central 911 chief diin pag-abot sa lugar, ihatag gilayon ang cheque ug relief goods aron masugdan na ang pag pang apod-apod ngadto sa mga apektado.
Gibutyag usab ni Al-ag nga gikuha ang maong kantidad sa 2019 budget gikan sa Quick Response Fund nga gikan sa Calamity Fund.
Matud pa sa bise mayor nga anaa pa sa P124M ang pondo sa dakbayan karong tuiga human dinhi gikuha ang P10M alang sa mga biktima ni bagyong Usman.
RadyoMaN Kirby Manzon
