Davao City – Ipadala na sa dili madugay ang pondong gialokar sa lokal nga gobyerno sa syudad isip tabang alang ngadto sa mga apektadong lugar sa Bagyong ‘Ompong’ nga gipailawum sa state of calamity.
Sa pakighinabi sa DXDC RMN Davao kang Committee on Finance, Ways and Means Chairperson Councilor Danilo Dayanghirang, aprubado na kagahapon sa hapon sa konseho sa Davao ang P20.5 million nga food and financial assistance alang ngadto sa mga Local Government Units diin asa deklaradong anaa sa state of calamity tungod sa damyos nga dala sa maong bagyo.
Gikatakdang ipadala karong adlaw’ng Biyernes ang maong tabang ngadto sa Mayoyao, Ifugao ug sa mga Probinsya sa Cagayan Valley, Isabela, Benguet, Ilocos Sur, Abra, Kalinga ug Tuguegarao City.
Ang maong pondo giingong dugang tabang gawas usab sa 10,000 food packs nga gisugdan na og apod-apod ngadto sa mga apektado sa paglampurnas ni Bagyong Ompong.
Samtang nanawagan ang konsehal ngadto ubang mga dabawenyos sa mga buot muhatag og tabang nga makigkoordinar lang sa Department of Social Welfare and Development (DSWD-XI).
RadyoMaN Renz Barbarona
