Ginhambalan na niya ang Department of Interior and Local Government ukon DILG suno kay South Cotabato Governor Reynaldo Tamayo Jr., nga padal-an sang show cause order ang city government sang Koronadal angot sa mali nga implementasyon tungod padayon sini nga ginapatuman ang movement pass kag ginalimitahan ang mga tawo kada banwa nga ginapasulod sa mga mall dire sa syudad.
Suno kay Governor Tamayo sang Mayo 15 pa wala na dapat sang movement pass kada LGU`s kag pati gani ang mga border areas ang ginapabuksan naman sang national government ugaling lang ginhingyo niya nga sarad-an anay agud nga mamonitor ang mga nagasulod sa South Cotabato nga halin sa mga lugar nga may local transmission sang COVID-19.
Ginpahayag sang gobernador dapat ipaenjoy na sang city government ang economic activities kag makabalik na ang pipila sa trabaho tungod indi naman infected ukon wala naman sang local transmission sang COVID-19 sa South Cotabato.
Dugang pa niya nga indi naman tama nga may job order nga empleyado nga ginbutang sa mga mall kundi dapat ang mga establishemento ang magpatuman sang health protocol kapareho sang physical distancing.
