Davao City – Gikatakdang mag-atubang og kasong large scale estafa ang mga nagpaluyo sa QuestLink Digital Marketing Services, usa ka investment schemes sa Tagum City diin nasibat niini ang P200M gikan sa ilang mga investors nga sagad mga residente sa maong lugar.
Sa pakighinabi sa DXDC RMN Davao kang Tagum PNP spokesperson Police Captain Anjanette Tirador, gikumpirma niini nga boluntaryong midangop sa kapulisan ang coordinator/agent sa QuestLink nga si Christian Etabes, 23-anyos nga taga Surigao City human nga wala na niini na-contact ang Chief Executive Officer (CEO) nga si Kenneth Paz Nagas, taga Quezon City ug si Rogie Sabando, operation manager/trader, human sa iyang pagpadala sa maong kantidad sa kwarta.
“Ang i-file gyud sa kadtong mga responsible, which is ang CEO ug ang operation manager, mag-atubangan gyud ni sila’g kaso nga large scale estafa, non bailable ni sya,” saysay ni Tirador.
Gibutyag ni Tirador nga niadto pa lamang June 1, 2019 nagsugod ang maong investment schemes diin nagsaad kini’g 500% nga tubo sa kwarta sa mga investors sulod lamang sa 15 ka adlaw.
Sa pagkakaron, nagtinabangay na ang Investigation section ug Criminal Investigation and Detection Group (CIDG) – Davao del Norte sa pagkuha og affidavit sa mga complainant o mga nabiktima sa maong investment scheme.
Dugang sa tigpamaba sa Tagum PNP nga andam nga makipag-alayon ang nahisgutang agent ngadto sa kapulisan ug gikatakda kining ipailawom sa Witness Protection Program sa Department of Justice (DoJ) aron kini ka protektahan diin magsilbi usab siyang state witness sa maong kaso.
RadyoMaN Kirby Manzon
