P24 million nga kantidad sang makinarya nahatag sa mga kwalipikado nga Farmers’ Cooperatives and Associations (FCAs)SouthCotabato.

Kabug-usan nga P24 million nga kantidad sang farm machines ang ginturn-over sa 21 ka mga kwalipikado nga Farmers’ Cooperatives and Associations (FCAs) sa ginpatigayon nga machinery turn-over sang Rice Competitiveness Enhancement Fund sa banwa sang Banga. May-angot sini, nagalab-ot sa 2,582 farmer-members halin sa 11 ka syudad kag mga banwa sa South Cotabato ang makabenepisyo sang farm machines halin sa 2019 tubtob 2021 funds. Samtang ang 31 ka mga makinarya ang ginalakipan sang 17 ka floating tillers, 9 ka combine harvesters kag 5 ka four-wheel-drive tractors sa diin ang mga banwa nga nakabenepisyo sang programa ang Banga, Koronadal City, Norala, Surallah, Tantangan, Lake Sebu, Sto. Niño, T’boli, Tupi, Polomolok kag General Santos City. Suno kay Engr. Ray Adarna, Mindanao B Cluster Head sang PHilMech ang nasambit nga mga makinarya ang makabulig sa mga mangunguma nga mapanubo ang production cost, mapataas ang savings kag mapadasig ang farm operations kumparar sa manual labor. Ginalauman nya nga halungan sang mga benepisyaryo ang mga ginhatag nga mga makinarya. Nagpasalamat naman ang mga FCA-beneficiaries sa nabaton nga mga makinarya.