P300 Million ginapain nga pondo sa Kalahi-CIDSS projects sa Rehiyon Dose.

Nagalab-ot sa P300 million ang gin-alokar nga pondo para sa community projects sang Department of Social Welfare and Development Office ukon DSWD 12 para subong nga tuig. Katuyuan sini nga mapaayo ang kabuhi sang katawhan sa rehiyon.
Ginpahayag ni DSWD 12 Regional Director Cezario Joel C. Espejo nga ang nasambit nga pondo ang kabahin sang loan sang gobyerno sa World Bank nga gamiton sa proyekto sa idalom sang Kapit-Bisig-Laban sa Kahirapan-A Comprehensive and Integrated Delivery of Social Services (Kalahi-CIDSS) Program bilang suporta nga makabangon ang mga residente sang 21 ka mga banwa nga apektado sang global health crisis sa rehiyon.
Sa idalom sang Kalahi-CIDSS, ang ahensya ang magahatag sang pondo sa community-identified kag community-managed responses para mabalik ukon mapaayo ang basic social services agud nga masabat ang epekto sang COVID-19 pandemic lakip na kalamidad nga nakaapekto sa mga pigado sa rehiyon.
Sa subong suno kay RD Espejo ang ahensya ang nagadeterminar sang kahandaan kag kapasidad sang mga natumod nga munisipalidad nga magpartisipar kag magpatuman sang programa subong nga tuig.
May-angot sini, ang mga banwa nga magaumpisa na amo ang Antipas, Kabacan, Magpet, kag President Roxas sa North Cotabato; Alabel sa Sarangani; Norala, Polomolok, Tampakan,Tantangan; Tupi sa South Cotabato; kag Columbio, Kalamansig, Lambayong kag Lebak sa Sultan Kudarat.
Samtang ang banwa sang Arakan, Makilala, Matalam, Midsayap, M’lang, kag Tulunan sa North Cotabato; kag Glan sa Sarangani ang maumpisahan na sa Hulyo subong nga tuig.
Pahayag pa ni Dir. Espejo nga kada tuig tubtob sa 2023 ang ahensya ang may P20 million grant sa kada munisipalidad depende sa poverty incidence, population, income class kag numero sang barangays.
Nahibaluan nga sa pito ka tuig ang DSWD 12 ang nakaimplementar sang P1.59 Billion nga kantidad sang 870 ka mga proyekto sa 650 ka mga lugar nga nakabenepisyo ang masobra sa tunga sa million nga mga pamilya.

Facebook Comments