Maga pulis del Tetuan Police Station ya pwede confisca shabu valor de P360,000 desde con dos maga suspechao drug pusher na Aurora Village, Guiwan last Sabado meja noche.
Con el maga suspechao ya conose como canda Richie Waja y Juhadi, alias Che, 34, soltero y si Geraldine Delos Reyes y Sargado, casao y sin trabaho.
Asegun na report del pulis el police poseur buyer amo el quien ya compra un paquete de shabu desde con el dos suspechao na valor de P200.
Cuando yan cambiahan ya el cen que ez marked money y el un paquete de shabu, police back-up team ya encercula canila y ya result ana diila aresto.
Durante el resquesida na diila cuerpo, maga pulis ya pwede pa encontra 10 paquete de shabu donde suma total de 11 paquete el ya recobri na diila possession.
El dos suspechao ta esta ya ahora na carcel del Tetuan Police Station mientras con el maga shabu dayun ya entrega na PNP Crime Laboratory.
Maga pulis ta prepara ya el propio caso que ay planta con el dos suspechao.
