P37 kilo sa bugas di makita sa Agdao Public Market

Davao City- Human gipang- hambog sa Department of Agriculture Davao Region nga aduna ‘nay mapalit nga P37 sa kilo sa bugas sa mga kamerkadohan, gisuroy sa News Team ang bugasan sa Agdao Public Market, apan walay ni usa ka bugasan sa maong merkado ang namaligya og tag-P37 nga kilo sa bugas.

Gipangutana sa DXDC RMN DAVAO NEWS TEAM ang usa sa mga rice retailers kon tinuod bang dunay namaligya og P37, apan matod ni Ulysses Paco, walay mapalit sa ingon nga presyo sa bugas sa Agdao Public Market ning kasamtangan.

Sa 12 ka bugasan sa Agdao Public Market, usa lang ka tindahan ang nagpresyo og P38 sa kilo sa bugas, apan suma ni Paco, ang klase sa maong bugas makonsidera na kining “SPOTTED RICE” kon dugmok ug yelo ang kolor niini ug dili na haom para kaonon pa sa tawo.

Gipasabot ni Paco, ang P41 ug P45 nga kilo sa bugas mao na ang pinakabarato nga variety sa local rice sa karon ug ang presyo sa matag sako niini wa pa magkunhod, busa lisod kung ilang ikanaog sa P37 ang matag kilo niini.

Ang pangutana karon sa mga Dabawenyo nga nang -yawat sa barato nga bugas ngadto sa DA-Davao Region, asa nga merkado dunay mapalit nga P37 sa kilo sa bugas kon tinuod man kini, ug nganong kinahanglan paman ilang ilimod sa publiko ang mga bugasan nga gabaligya sa mas ubos nga kantidad.

RadyoMaN Joel Viray