Davao City – Kasong may kalapasan sa Republic Act 9165 kun Comprehensive Dangerous Drugs Act of 2002 ubos sa Section 5 ug Section 11 ang atubangon karon sa nadakpang giingong big time pusher sa Davao Region.
Malampusong nadakpan atol sa joint buy-bust operation sa Philippine Drug Enforcement Agency XI sa pagpanguna ni PDEA XI Regional Director Antonio Rivera uban ang Regional Drug Enforcement Unit sa Police Regional Office XI, Davao del Norte Provincial Intelligence Branch ug Tagum City Police Station ang giingong Top 2 nga anaa sa target list nga tigpahuyot og shabu nga si Juvy Ann Tangaro alyas Yan-Yan, 38 anyos ug residente sa Purok Timog, Kawayan Coop-B, Tagum City, Davao del Norte.
Bandang alas 11 sa buntag adlawng Sabado naaresto ang suspek didto sa Purok 1-B, Bacuring, Barangay Madaum, Tagum City, Davao del Norte human napalitan kini sa nagpailang poseur buyer og 5 ka gramos nga gituohang shabu nga nagkantidad og P45,000.
Atol usab sa gikasang operasyon nakarekober sa mga operatiba ang 25 gramos nga dakong pakete sa giingong shabu nga adunay street value nga P375,000 ug ug boodle money.
Matud pa sa report ang nadakpan lakip kini sa Regional Target List ug Provincial Target List sa Davao del Norte.
Si Tangaro priso karon sa detention facility sa Philippine Drug Enforcement Agency Regional Office XI.
RadyoMaN Aimee Guinita
