Davao City – Gibana-banaang mokabat sa P5-million ang damyos sa nahitabong sunog alas-4:30 kagahapong adlawa sa Barangay Sto. Niño Talaingod, Davao del Norte.
Sa ekslusibong pakighinabi kang SFO1 Demar Binanua, fire marshall sa Talaingod Fire Station, 17 ka mga gambalay ang naugdaw sa maong sunog diin 14 niini pulos residential samtang tulo ang commercial buildings.
Base sa ilang inisyal nga imbestigasyon, nagsugod ang maong sunog sa panimalay nga gipanag-iyahan sa usa ka Martha Tecson diin matud pa sa ilang kisame ang sinugdanan.
Sumala pa, nangadye ang mga tagtungod sa pamilyang Tecson niadtong panahona diin giingon nga kalit na lamang ni-fluctuate ang kuryente sa maong panimalay ug didto na misilaob ang dakong sunog pipila ka minutos lang ang milabay.
Hinuon, alas 6:15 nadeklara nga total fire out ang maong insidente tungod usab sa tabang sa mga kasikbit nga fire stations ug walay natalang casualties.
Sa pagkakaron padayon ang ilang imbestigasyon bahin sa maong insidente ug gituohang short-circuit ang kawsa niini.
Samtang nipahiluna usa sa function hall sa usa ka simbahan sa Talaingod ang mga biktima sa dakong sunog.
RadyoMaN Jason Amisola
