Davao City – Nagbahad ang Land Transportation Franchising and Regulatory Board (LTFRB-XI) sa mga driver sa Public Utility Vehicles (PUVs) nga dili magpatuman og social distancing sa mga pasahero.
Sa interbyu sa DXDC RMN Davao kang Nonito Llanos III, Regional Director sa LTFRB-XI, gibutyag niini nga adunay multang P5,000 ang usa ka PUV driver nga pakyas nga mupatuman og physical distancing nga usa sa minimum public health standards panahon sa pandemya.
Subay sa LTFRB Memorandum Circular, angay magbaton og 0.3 meters nga distansya ang matag pasahero ug dili pwede mag-elbow to elbow ang nahisgutan sulod sa sakyanan aron kalikayan ang risgo sa Coronavirus Disease 2019 (COVID-19).
“Ang atong direktiba niani is padayon gihapon ang implementasyon sa physical distancing sama atong panahon nga naa pay barrier. That means to say, sa atong mga Public Utility Vehicles, dapat naa ‘tay point three (0.3) meters distancing from one passenger to the other,” matud ni Llanos.
Panawagan ni Llanos sa publiko nga magpabakuna batok COVID-19 diin kung mutaas ang vaccination rate sa Davao Region, patas-an usab ang seating capacity PUVs.
Sa laing bahin, giklaro sa LTFRB official nga nagpabiling nuwebe pesos (P9) ang minimum nga pamasahe sa PUVs, ug wala kini nausab.
RadyoMaN Kirby Manzon
