Matuman na ang dugay ng gipangandoy sa mga residente sa Barangay Kanalo og Barangay Nomoh sakop sa lungsod sa Maasim nga masemento ang ilang dalan gikan sa national highway tungod kay aprobado na kagahapon sa sesyon sa Sangguniang Panlalawigan sa Sarangani Province ang pondo nga pagpasemento niini nikantidad og P56.9 Milyones ka pesos, sa pag-ayuda sa PRDP kon Philippine Rural Development Program.
Sa giduso nga resolusyon ni Board Member Hermie Galzote, ang chairman sa komitiba sa legal matters, gitagaan og pagtugot si Governor Steve Chiongbian Solon nga pirmahan ang Implementation Management Agreement tali sa Department of Agriculture aron mahatag na ang pondo og masugdan ang maong pagpasemento sa dul-an lima (5) ka kilometrong farm-to-market road kung diin may counterpart ang Provincial Government sa Sarangani balor og P5.6 Milyon ka pesos.
Mukabat sa P912.2 Milyones ka pesos ang kinatibuk-ang kantidad sa mga proyekto nga gipondohan sa PRDP pa lang alang sa Sarangani Province, nag-una niini ang pagpasemento sa mga nag-unang kadalanan sa kabukiran. Wala pay apil ang laing road project sa DILG og sa Department of Tourism.
Una ng gihingusgan ni Governor Solon nga nag-una sa iyang prayoridad nga maablihan ang kabukiran pinaagi sa sementadong kadalanan aron paspas makasulod ang kalambuan og ang serbisyo sa gobyerno ngadto sa mga yanong katawhan, sa pag-suporta nila Senador Manny og Congressman Ruel Pacquiao, mga mayores, Sangguniang Panlalawigan, og hilabi na ni Pangulong Rodrigo Duterte.
