TACLOBAN CITY – Ginkompirma han National Economic and Development Authority (NEDA) nga umabot ha PHP729.67 Million an waray kagamiti nga pondo para han recovery han Eastern Visayas matapos an paglasurbo han Super Typhoon Yolanda ngan yana in ginbalik na ini ha National Treasury.
An budget in ha ilarom han 2016 “Yolanda” Recovery and Reconstruction Program, narelease ini nga pondo ha syahan nga bulan han 2017 ngan gutiay nala nga oras para maprocure o magamit an pondo ha sakob han usa katuig, sumala kan NEDA Regional Director Bonifacio Uy.
An naconsolidate nga waray kagamit nga budget in tikang ha calamity fund, national disaster risk reduction and management fund, quick response fund, automatic and supplemental appropriation, realignments and savings, and regular agency funds, ngan iba pa.
Nagkamayada man gud hin pira nga problema an magkadurudilain nga ahensya han gobyerno ha pagproseso hin dokumento para magamit an pondo sumala han NEDA.
Pinakadako nga pondo ha duha nga ahensya ngan unibersidad an waray kahigamiti sugad han Department of Social Welfare and Development (PHP493.2 Million), Department of Agriculture (PHP114.14 Million), ngan Visayas State University (PHP80.05 Million).
Apil gihapon ha listahan an Department of Public Works and Highways (PHP26.24 Million), Department Of Health (php7.9 million), an Department of Interior and Local Government (PHP4.34 Million), Leyte Normal University (PHP3.6 Million), Professional Regulation Commission (PHP178,745), ngan Northwest Samar State University (PHP1,111).
Nagrequest na an NEDA Regional Office 8 nga ig-reallocate an budget han Central Government para magamit ha ginkikinahanglan han tawo ha mga apektado nga lugar han Yolanda.
