Nagalab-ot sa P8.1 billion ang pondo subong nga tuig sang Department of Social Welfare and Development sa social services sa diin magapadulong ang daku nga pondo sa kinahanglanon sang mga pigado nga mga pamilya sa rehiyon dose.
Suno kay DSWD 12 Regional Director Cezario Joel Espejo sa nasambit nga pondo P5.9 billion ang para sa monthly grants sang mga benepisyaryo sang Pantawid Pamilyang Pilipino Program, samtang P122.2 million para sa Sustainable Livelihood Program paagi sa paghatag sang seed capital sa mga benepisyaryo sang livelihood projects.
Ang duha ka programa sang ahensya ang may katuyuan nga mahaw-as sa kapigaduhon ang mga pigado nga mga pamilya sa rehiyon
Ginpasiguro naman ni RD Espejo nga indi sini kunsintihon ang ila mga empleyado nga gamiton sa indi tama ang pondo.
Pahayag naman ni DSWD 12 Budget Chief Mohammad Fayed Sarip nga subong nga tuig nga alokasyon sa social services, nalakip ang P 1.6 billion Social Pension Program para sa mga indigent senior citizens nga makabaton sang P500.00 monthly stipend.
Yara naman sa P186.4 million ang gin-alokar sa Supplementary Feeding Program, isa man sa programa sang ahensya upod ang local government units paagi sa paghatag sang hot meals sa mga kabataan sang lima ka adlaw kada semana sa sulod sang 120 ka adlaw.
