Sumala sa Task Force Davao, kagahapon bandang 12:50 sa kaadlawon kagahapong adlawa May 7, 2023 mokantidad sa P397,440.00 nga shabu lakip na .45 nga armas ug mga bala ang nasakmit sulod sa pula nga Toyota Vios nga adunay plate number nga LAK 3511 nga pasulod sa dakbayan.
Sikop ang tulo ka mga sakay sa maong kotse nga sila Jhon Axel Bohion, 21 anyos; Alvin S Macas, 28 anyos ug Apple Kristine M Gabayan, 35 anyos nga mga taga-Purok Tangegue, San Pedro, Panabo City.
Sa maong checkpoint usab wala makalusot human maharang sa mga personahe ang P490,080.00 nga shabu sa posisyon usa ka 35 anyos nga pasahero og bus nga giilang si Alberto Arancon, residente sa San Nicolas, Buhangin, Davao City.
Dakpan usab ang usa ka Renny Buta, 45 anyos nga taga-Purok Tangegue, Brgy San Pedro, Panabo City, kinsa sakay usab og public utility bus diin nakuha sa posisyon niini ang anaa sa P40,320.00.
Mokantidad sa P4,000 nga shabu ang nakaplagan sa mga personahe sa usa ka pampasaheruang van nga giidentipikang si Arnold Sugarol Jr, 33 anyos ug residente sa R. Castillo St, Agdao, Davao City.
Niadtong Mayo 5, 2023, nadakpan ang usa 24 anyos nga giilang si Anfernee Lian C Aguilar, 24 anyos nga taga Brgy Salvacion, Panabo City, Davao Del Norte nga sakay og bus nga pasulod sa dakbayan diin mobalor sa kapin P600 nga marijuana ang gidala-dala niini.
Sikop usab ang usa ka van passenger nga giilang si Jerson Satira Garcia ,26 anyos, residente sa Purok 2A, Riverside, Brgy. Ilang, Bunawan District, Davao City diin nakuha kaniya ang P1,600 nga pakete sa suspected shabu.
Giturn-over na ngadto sa kapulisan ang tanang mga drug suspects ug mag-atubang kasong paglapas sa RA 9165 kun Comprehensive Dangerous Drugs Act.
Gidayeg ug gipasalamatan ni Task Force Davao Commander Colonel Darren Comia ang mga TFD troopers sa epektibo ug efficient nga performance sa ilahang trabaho aron ma ensure ang safety ug security sa Davao City.
RadyoMaN Aimee Guinita
