PAANDAM NI MAYOR ESPINOSA SA MGA DURUGISTA SA ILOILO CITY HALL

41

Nagpa-andam si Iloilo City Mayor Joe Espinosa III sa tanan nga empleyado sang Iloilo City Hall nga nagagamit sang illegal nga druga nga untatan na ang ila ginahimo.

Ini ang kasunod sang pagkadakop kay Iloilo City Planning Officer 1 Winstone Porras sa buy bust operation sang kapulisan kagab-I sa diin gin-ako sini nga nagagamit siya sang illegal nga druga.

Nakuha sang mga kapulisan sang Jaro Police Station ang anum ka sachet sang suspected shabu, 1,600 pesos nga buy bust money kag cell phone.

Suno kay Mayor Espinosa una na nga naggwa ang pangalan ni Porras sa suggestion box nga ginbutang nila sa city hall.

Isa sa mga ginpaidalum si Porras sa random drug test apang nangin negatibo ang resulta.

Dugang pa sang alkalde nga ang pagkatikma kay Porras ang nagapamatuod sa una na nga alegasyun sa ila nga suggestion box.

Nagapakig-angut na sa karon sa kapulisan ang City Government para nga ma- proseso ang pagpasaka sang kaso administratibo batok sa regular employee sang Iloilo City Hall nga si Winstone Porras.

Detain subong sa police station ang regular nga empleyado sang city hall upod sa kay Jerky Marie Jubelag nga kaupod sini sang ginpatigayon ang operasyon sang mga otoridad.

Facebook Comments