Sarangani Province—Laing batch na usab sa mga kabataan sa Sarangani Province ang buhing nagpamatuod nga dako gayung gikatampo sa kausaban sa ilang kinabuhi ang nabantog na nga scholarship program sa Provincial Government sa Sarangani nga mao ang Paaral/PPSS kon Paaral Para sa Sarangan Scholarship Program.
Lakip nga nagpasalamat ang baynte (20) anyos nga si Ellah Pahuwayan, taga-Barangay Lun Padidu, Malapatan. Nahimo kining emosyonal tungod kay bisan wala kini ni-gradwar nga may academic award apan malampuson niining nahuman ang iyang kurso nga Bachelor of Elementary Education Major in General Education sa tabang sa Paaral scholarship program og sa bendisyon sa Ginoo. Gidayig niini ang pamunuan ni Governor Steve Chiongbian Solon tungod wala matud pa gibiyaan ang mga kabus nga kabataan sa pagkab-ot sa ilang mga damgo og oportunidad.
Ang iyang amahan ang ordinaryong security guard sa Lun Padidu National High School, samtang iyang inahan ang yano nga BHW o barangay health worker. Dili tiaw matud pa ang mga galastuhan samtang ga-eskwela sa pribadong eskwelahan sa Gensan, maong nahimong sideline pa niini ang mang-labada sa iyang ig-agaw. Gawas sa panglabada, gapamaligya usab kinig kakanin sa iyang mga classmate, og todo-suporta usab ang iyang college best friend.
Ang allowance nga iyang nakuha sa PPSS ang dakog gikatampo sa pag-sustinir sa galastuhan sa iyang pagtungha, apil na ang balon og project sa iyang duha (2) ka magsuon. Himuon dapat matud pa nga inspirasyon og motibasyon sa pagpaningkamot ang kahimtang sa kinabuhi.
