Packing plant ginsunog kag mga gwardiya sang Sumifru sa T`boli, South Cotabato gindis-armahan sang NPA.

Ginsunog sang ginabulubanta 30 ka mga miyembro sang ginapatihan New People’s Army ukon NPA nga armado sang AK 47 kag M16 armalite rifle ang packing plant nga ginapanag-iyahan sang SUMIFRU sa banwa sang T’boli, South Cotabato alas 9:45 sang nagligad nga gab-i kag gin-dis-armahan pa ang mga gwardya.
Ini ang ginkumpirmar ni Police Chief Inspector Ramil Villagracia, Chief of Police sang T’boli MPS.
Dugang pa niya matapos nakuha sang mga armado ang duha ka 9mm nga armas, isa ka 12 gauge shotgun, isa ka handheld radio sang mga gwardya gilayon sang mga ini nga ginsunog ang nasambit nga packing plant.
Dugang pa ni Villagracia, gintinguhaan pa nga sunugon sang NPA ang prime mover nga yara sa area, apang wala na nadayon sa baylo ang water tanker sang SUMIFRU ang ginsunog sang nasambit nga grupo.
Ginabulubanta naman sa 6 milyones ka pesos ang natuga nga danyos sa nasambit nga insidente.
May-angot sino kahapon nga adlaw nagpatawag sang emergency meeting si T`boli Mayor Dibu Tuan upod ang mga katapo sang kapolisan, militar kag mga barangay kapitan agud nga mas pa nga pabakudon ang seguridad sa banwa batok sa pagpanghalit sa grupo sang NPA.