Gikumpirma karon sa armadong kusog sa nasud-Pilipinas ang pag-rescue sa napulo ka mga bag-ong hostages nga gibihag sa grupong Maute sa nagpadayong ‘mopping up operations’ sa Marawi battle area.
Sa regular news briefing sa palasyo sa Malacañang, gibatbat ni AFP spokesperson Gen. Restituto Padilla nga gawas sa 10, adunay laing onse kinsa bag-o lang nakagawas sa war zone apan gipailawom pa sa ‘verification procedures’ aron sa pagsuta kun sila ba lehitimong mga hostages ug haron malikayan nga masagulan sila sa mga nagtakuban nga mga terorista.
Dugang sa tigpamaba, aduna usab silay dugang mga casualties ug mga samaron sa nagpadayong ‘end game battles’ sa Islamic City.
Usab nihangyo ang nasudnong kasundaluhan ngadto sa mga sibilyan nga tugtan usa ang AFP nga mag-clearing sa battle sites aron kalikayan ang nahitabo sa mga nasud sama sa Cambodia ug Laos diin daghan ang nakabsan sa kinabuhi dili sa enkwentro apan gumikan kay nabuthan sa mga unexploded ordinance and explosives gikan sa duruha ka mga pundok sa gubat.
Usab nasayran nga aduna na lamay nahibilin nga tunga sa ektariyang luna ang gilumluman karon sa nahibiling mga Maute ‘stragglers’ diin gikonsidera nga hapit na gayud matapos ang buruka ning lugara.
Usaka clean-up drive gititulohan nga ‘Brigada Marawi’ gimontar karon aron paghinlo ug paghikutar sa maong lugar nga mapuy-an pag-usab niadtong mga napugos pagbakwit gumikan sa lima ka bulan nga gyera.
RadyoMan June Duterte
