General Santos City–Gipaimbistigahan na karon sa City Engineering’s Office (CEO) ang gihimong pag abandona sa ginahimong konstraksyon sa traffic light sa Aparente Street ug Santiago blvd. sa contractor niini nga Abratique And Associates. Kini ang nahimong pagbutyag ni Engr. Emerald Signar ang Assistant Department Head sa City Engineering’s Office.
Sumala pa niini nga nakaabot sa ilahang buhatan pinaagi sa ilang mga field engineer nga giabandona na sa mga trabahante ang maong proyekto tungod kay wala na sila ginabayran sa contractor niini kung asa nahuman na usab ang contract time niini apan anaa palang sa pipila ka porsyento ang nahuman sa mga nasampit.
Dugang pa ni Engr. Signar nga isip aksyon nga buhaton sa ilahang buhatan tungod kay subra na ka delay ang maong proyekto ilaha na kining irekomenda para materminate ang project ug kuhaon ug balik ang kwarta nga gibayad sa contractor.
Apan gipaklaro niini nga bisan paman ug mag rekomenda na sila para sa termination sa proyekto hatagan pa ang contractor ug tyansa nga humanon ang proyekto apan kung dili gyud nila kini humanon posibleng mosangko sa pagpasang-at ug tukmang kaso ang syudad batok sa contractor.
Nasayran nga anaa lang sa 21 porsyento ang nahuman sa dalan sa Santiago blvd. Samtang 27 porsyento palang ang nahuman sa proyekto sa Aparente Street kung asa mukabat ngadto sa 25 milyones ang kantidad sa maong proyekto.(Dave Silagan)
