Davao City – Gi-awhag ni 2nd District Councilor Dante Apostol ang City Traffic Transport Management Office (CTTMO) nga maghimo og pagtuon sa posibilidad sa pag-abli og rota alang sa mga Bypass Roads sa ikaduhang distrito ning siyudad.
Kini human giduso mismo ni Apostol ang pag-abli og bag-ong rota sa upat ka Bypass Road sa Norteng bahin sa dakbayan.
Segun sa konsehal nga dako kini’g ayuda sa pagpagaan sa dagan sa trapiko gikan sa Panacan paingon na sa Bunawan area.
Kasamtangan ginahimo ang Bypass Roads sa may Bunawan, Tibungco, Ilang, ug Panacan ug 20 porciento na lang ang kulang aron makumpleto ang proyekto.
Sa rekumendasyon, ang rotang Panacan palahuson sa Acacia, ug Indangan, ang rota nga Ilang paagion na sa Barangay Mudiang ug lahos sa Indangan, ang rota nga Tibungco palikoon na lahos sa Indangan, ug ang rota nga Bunawan susama sab nga dalan ang agian.
Ug kung matigayon ang bag-ong mga rota lauman ang pagluag unya sa dagan sa trapiko gikan sa Ilang paingon na sa Sasa ug kasadpang bahin sa dakbayan.
RadyoMaN Joel Viray
