General Santos City–Sukwahi sa naandan nga pag-abli sa klase sa mga tulunghaan sa SOCCSKSARGEN Area, pinasahi ang nahitabo kagahapong adlawa dinhi sa Rehiyon 12. Sa pamahayag ni Dr Allan Farnazo- Regional Director sa Deped Region 12, murag wala lay nahitabo nga pagsugod sa klase kagahapon kung asa anaa lang sa ilang mga panimalay ang mga estudyante og mga magtutudlo.
Dili susama sa naandan nga masinati ang paghuot sa trapiko og pagdasok sa mga tawo sa matag tulunghaan. Nasayran nga kagahapong adlawa wala usay panag-tigom nga natigayon sa mga tulunghaan atul sa opening sa kasamtangang school year. Apan gibutyag ni Director Farnazo nga adunay gipahigayong seremonyas pinaagi sa virtual presentation sa mga magtutudlo og mga opisyal sa Deped.
Tumong matud pa niini nga malikayan ang close contact og matuman ang minimum health protocol batok sa covid 19. Aminado si Farnazo nga dili kalikayan nga adunay mga magtutudlo og ginikanan nga muadto sa mga tulunghaan tungod sa importanteng buluhaton sama sa pagkuha og module. Apan gipaniguro ni Farnazo nga ila gyud ipatuman ang health protocol aron nga malikayan ang pagkuyap sa covid virus. Gipanghinaot usab niini nga magmalampuson ang bag-ong pamaagi sa pagtungha karon bisan pa man nga naglisod sila sa paghimo niini. (JB)
