Upat ka person of interest ang gitutokan karon sa imbestigasyon aron pagsulbad sa pag-ambush ni Kagawad Jonathan Joseph Borja sa Barangay 3 ning syudad sa Cagayan de Oro.
Mao kini ang gibutyag ni Supt. Mardy Hortillosa, Spokesman sa Cagayan de Oro City Police Office kon COCPO.
Apan matud ni Hortillosa nga dili pa mahimong ipagawas sa mga imbestigador ang ngalan sa maong mga tawo tungod kay person of interest pa lamang ug dili pa sila mailang suspek sa pag-ambush ni Kagawad Borja niadtong milabayng semana.
Mahinumduman nga si Kagawad Borja sakay sa iyang color puti nga Mitsubishi Montero ug gi-ambush sa riding in tandem sa 6th – 18th Street Nazareth niadtong Biyernis sa milabayng semana.
Apan suwerti kay buhi ang biktima kay igo lamang napingsan sa bala sa .45 Caliber pistol ang iyang agtang.
Matud ni Hortillosa nga gilauman sa mga imbestigador sa COCPO nga pinaagi sa person of interest masulbad ra gihapon ang pag-ambush ni Kagawad Borja ug mailhan ang gunman ug mataral sa hukmanan.
