Mas nagkusog pa ang Typhoon Mangkhut samtang pasulod ini sa aton nga pungsod.
Ang bagyo ulihi nga nakit-an sa kalayu-on nga 1,390 kilometers east sang Southern Luzon.
Nagbaskog pa ini sa hangin nga nagalab-ot sa 200 kph kag pagmadlos nga 245 kph.
Westward ang direksyon sang bagyo sa kadasigon nga 20 kph.
Suno kay PAG-ASA senior weather specialist Chris Perez, kun indi magbag-o ang kadasigon sang bagyo, posible ini magsulod sa Philippine Area of Responsibility (PAR) subong nga aga.
Sini man nga adlaw ginalauman nga magapaguwa ang PAG-ASA sang severe weather bulletin para sa nasambit nga bagyo nga pagatawgon nga Ompong sa iya pagsulod sa PAR.
Sa madason nga apat tubtob lima ka adlaw paga-agyan sang bagyo ang Northern Luzon.
Samtang, mangin maayo naman ang panahon subong nga adlaw sa daku nga bahin sang pungsod.
Sa weather forecast sang PAG-ASA, apektado sang habagat ang Palawan, Western Visayas lakip na ang ciudad sang Bacolod kag probinsya sang Negros Occidental, kag western section sang Mindanao, rason nga maka-eskperyensya ang ini nga mga lugar sang magulugal-umon nga kalangitan nga may lapta lapta nga pag-ulan.
Isolated rainshowers kag thunderstorms naman ang makaapekto sa nabilin nga bahin sang pungsod. -RCSG/iFM News
