Sarangani Province–Kasado na ang mahitabo nga pag-host sa Sarangani Province sa Mindanao-wide Conference of Youth, Youth in Climate Change Action karong unang semana sa bulan sa Oktubre. Kini ang gikumpirma ni Bimbo Tablazon, ang program manager sa Sulong Kabataan program.
Tambungan kini sa gatusan ka mga environmental youth leaders gikan sa isla sa Mindanao nga nakapasa sa gipahigayon nga screening sa National Youth Commission kon N.Y.C. kaabag ang Climate Change Commission.
Matigayon ang panagtigum sa usa ka balay-patigayon sa lungsod sa Kiamba sulod sa tulo ka adlaw. Una ng nibisita niaging bulan sa Agosto si Assistant Secretary Paul Anthony Pangilinan, commissioner-at-large sa NYC, aron i-plantsa ngadto kang Governor Steve Chiongbian Solon ang maong dakong aktibidad.
Nakadayig ang NYC sa pagka-aktibo sa mga kabataan sa Sarangani sa pag-atiman sa kinaiyahan hinungdan nga gihimong Mindanao host ang Sarangani. Dili usab malilong ang hugot nga kampanya ni Governor Solon sa pag-preserba og pag-protekta sa kinaiyahan, sa pagsuporta sa mga kaubanang opisyales og mga law enforcement agencies sama sa DENR, kapulisan og kasundaluhan.
Ang Sarangani Province ang usa (1) sa tulo (3) ka mga lugar sa entiro Pilipinas nga gipili nga mag-host sa maong environmental youth conference, maong garbo kini sa mga taga-Sarangani.
