Pagadian City – Ang lokal nga diosesis sa Pagadian miabi-abi sa bag-ong Diocesan Bishop nga si Ronald Lunas, kinsa gi-install kagahapon sa Sto. Niño Cathedral.
Gihulipan ni Bishop Lunas, si Bishop Emmanuel Cabajar kinsa neretiro sa edad nga 76-anyos.
.
Si Metropolitan Archbishop Martin Jumuad nga gikan sa Archdiocese sa Ozamis maoy nanguna sa pag-instalar nga gisaksihan sa Apostolic Nuncio sa Pilipinas, ang Italyanong Arsobispo nga si Gabriele Giordano Caccia.
Si Lunas, ang ikalimang lider sa Katoliko sa lokal nga diosesis sa pagadian, misulti nga sa pagkakaron dili siya komportable nga tawgon nga “bishop” ug mas sayon kaniya nga tawgong “Father Bong”.
Si Bishop Cabajar miingon nga siya masaligon sa kapasidad usa ka bag-ong “magbalantay” sa lokal nga diosesis.
Ang Interfaith Forum alang sa Solidarity and Peace dinhi sa probinsya, nga gilakipan sa mga lumad nga Subanen ug mga Muslim, nakasaksi usab sa pag-instalar sa bag-ong obispo.
Ang maong grupo gipangulohan ni Cabajar isip pangulong convenor, kinsa miingon nga gusto niya nga ipasa ngadto sa bag-ong Obispo ang pagpangulo ug adbokasiya sa panag-uyon sa mga Muslim, Kristiyano ug Subanens.
Si bishop Lunas dali nga midawat sa bag-ong papel sa grupo sa interfaith, nga nag-ingon nga kini ang panawagan sa Vatican alang sa mga Katoliko sa paghimo sa inter-religious dialogues.
Si Cabajar kinsa nag-alagad sulod sa halos 15 ka tuig sa diocese sa Pagadian, nipahiluna pagbalik sa iyang panimalay sa Redemptorist sa Cebu City.
Ang pag-instalar ni Bishop Lunas nasaksihan sa mga obispo, pari, deacono ug uban pang mga lider sa Katoliko gikan sa Palawan, Davao, Mati, Iligan, Zamboanga, Dipolog, Ozamiz, Digos ug Butuan.
Si Bihop Lunas gi-orden nga bishop kaniadtong Pebrero 11 sa Digos City ug mipahiluna sa posisyon puli ni Cabajar kagahapong adlaw dungan sa kasaulugan Annunciation of the Lord.
