Iligan City- Nakaginhawa na karon ang mga pamilya sa Bayanihan Village sa Barangay Sta. Elena, ning dakbayan, human sila gihatagan og usa ka semana aron boluntaryong makahawa sa mga balay nga ilang napalit gikan sa mga Sendong survivors kinsa unang nanag-iya niini.
Kagahapon, tulo ka mga balay lamang ang gi-padlock sa Task Force nga gimugna sa kagamhanang lokal, nga maoy gimandoan nga manguna sa pagpapahawa sa mga pamilya’ng ilegal nga nakapalit sa nasangpit nga mga housing units.
Gipaminaw sa kagamhanang local ang mga residente nga mamutos una ug mangita’g kabalhinan.
Niadtong Lunes,gisugdan sa LGU Iligan ang pagpasirado sa kapin kun kulang mil tres (1,300) ka mga housing units nga kasagaran napalit sa mga taga- Marawi City niadto pa’ng tuig 2013.
Pag-ulbo sa giyera sa Marawi, nadugangan ang mga namalit og mga pamilyang bakwit.
Apan gitin-aw sa kagamhanang lokal nga dili lamang mga pamilya’ng Maranao ang kinahanglang mohawa apan lakip na mga Christian.
Matud pa sa National Housing Authority, nakalatid sa memorandum of agreement sa gobyerno ug sa mga rightful beneficiaries nga dili kini ibaligya.
Kung dili na sila gusto mopuyo niini, ibalik kini ngadto sa gobyerno aron ihatag ngadto sa uban pa’ng mga Sendong survivors nga wala pa mahataga’g balay.
