Isa ka lider sang New People’s Army ukon NPA ang suspek sa pagpatay kay Punong Barangay Eustaquio Porras sang Lonoy, Calinog.
Ini ang ginkumpirmar ni PSSUPT Marlon Tayaba, Director sang Iloilo Police Provincial Office ukon IPPO.
Suno kay Tayaba, vice commanding officer sang NPA ang suspek nga si Ronald Llupar alyas Ka Isidro, 34 anyos sang Bag-ong Barrio, Tapaz, Capiz.
Una na nagpakilala si Llupar bilang si Vincent Paduga.
Ginkilala naman ang upod ni Llupar nga si Ka Ramon kag ginapahayag miyembro man sang NPA.
Ginpahayag ni Tayaba nga may mga warrant of arrest si Llupar sa kaso nga rebelyon , murder kag arson.
Dugang pa ni Tayaba nga gin-ako ni Llupar nga may nagsugo sa ila agud patyon si Porras apang wala niya gintuad kon sin-o.
Suno pa kay Tayaba nga madamo sang nangin karelasyon si Punong Barangay Porras kag santo sa ila nabaton nga impormasyon, may kilala ang asawa sang nangin karelasyon ni Porras kag ini ang nagpatigayon sa grupo ni Llupar.
Sa karon, nagapadayon ang imbestigasyon sang kapulisan agud matumod kon sin-o ang nagpapatay kay Porras.
Nahibaluan nga natikma sang kapulisan si Llupar matapos gin-confine sa Qualimed Hospital matapos naigo sang bala sa idalom sang tiyan sang nagbalos palupok si Punong Barangay Eustaquio Porras.
