General Santos City—- Nagsugod na ug libot ang team ni Nonoy Pareja sa Waste Management Office alang sa pagpahibalo sa mga tindahan ug katawhan nga ginasugdan na ang implementasyon sa pag-regulate sa paggamit ug mga plastic cellophane sa dakbayan.
Sumala niya nga ang pag-regulate sa paggamit ug plastic cellophane ang subay sa City Ordinace 03 kung asa ang kinsa mang madakpan nga mulapas niini ang adunay multa nga mukabat sa 5mil ka pesos indibidwal man o mga establishemento.
Pagpaklaro niya nga sa karon, ginatugutan pa ang paggamit ug plastic cellophane apan alang lang sa mga primary nga mga palaliton hilabi na kadtong mga mabasa sama sa isda, karne ug uban pa.
Dugang pamahayag ni Pareja nga tumong sa maong ordinansa mao ang pagregulate usab sa pag-dispose sa mga plastic cellophane nga sagad maoy hinungdan sa pagbara sa mga kanal ingon man hinungdan sa polusyon sa kadagatan ug ang pagsunog niini.
Pag-angkon niya nga 22 porsyento sa mga basura nga ginalabay sa sanitary landfill matag adlaw ang mga plastic ug kini matud pa maoy hinungdan nga daling mapuno ang landfill gumikan dili man kini mabulok o dili malata.
Sa karon, ilaha usab ginatutukan ang mga gika-ingong oxo- biodegradable nga mga plastic cellophane nga ginagamit sa ubang mga tindahan hilabi na sa mga dagkong establishemento gumikan posibleng kini ang gitatakan lang ug aduna na matud pa silay mga nadakpan.
