South Cotabato—Dako ang pagtuo sa presidenti sa Mayors League sa South Cotabato ug mayor sa Tupi nga si Mayor Reynaldo Tamayo nga parti sa proseso sa paghinlo sa pangalan sa duha ka mayor sa South Cotabato ug uban pang mayor sa nasud ang pagtanggal sa ilang Supervisory Power sa Local Police.
Sumala ni Mayor Tamayo nga wala nila giisip nga negatibo ang pagtanggal sa police power kang Sto. Nino Mayor Pablo Matinong Jr. ug Banga Mayor Albert Palencia, inay usa matud pa kini nga positibong lakang aron nga hingpit nang mahinluan ang ilang pangalan.
Nasayran nga una nang naapil ang pangalan sa duha ka mga mayor sa mga gikonsiderang protector sa iligal nga droga.
Dugang pagbutyag ni Mayor Tamayo nga walay kabag-uhan sa operasyon sa LGU ug bisan na sa kapulisan bisan nga tanggalon pa ang police power sa usa ka mayor.
Gipaklaro usab ni Mayor Tamayo nga sa iyang kabahin nagtuo siya nga wala gyud nalambigit sa iligal nga druga ang duha ka mayor nga silang mayor Palencia ug Mayor matinong.
Ang sayop ra sa mga nahisgutan nga wala nila masumpo ang iligal nga druga sa ilang mga munisipyo.
