Santos City– Gihingusgan ni Gensan City Mayor Ronnel Rivera nga dili gyud mamahimong did-an ang mga Locally Stranded Individual (LSI) ug mga Repatriated Overseas Filipino (ROF) nga mupa-uli sa dakbayan.
Ang kinahanglan lang himuon sa mga LSI ug ROF nga mutuman lang gyud sa saktong protocol ug mga guidelines nga ginapatuman sa syudad.
Giklaro hinuon sa Mayor nga anam-anam lang ang ilang pagpauli sa mga OFW ug LSI gumikan ila usab ginatan-aw ang kapasidad sa syudad sa hisgutanang pasilidad nga butangan sa mga nasangpit.
Nasayran nga libuan ka mga RPOF ug LSI ang gilaumang mopauli sa Gensan. Giangkon usab ni Mayor Rivera nga dili gyud kaya sa syudad higayon nga magdungan sa pag-uli ang tanan gumikan limitado lang ang quarantine facility sa Gensan ug ang ihap sa mga health workers.
Kung adunay saktong koordinasyon sa LGU ang National IATF, walay mamahimong poroblema sa pag-abot sa mga LSI ug ROF. Sa karon matud pa, luyo pa man sa mga problema nga nasinatian, nakaya sa LGU-Gensan ang pagdawat sa mga LSI ug ROF, apan siya nanghinaut nga maka-sustain ang mga personahe sa mga ahensya sa gobyerno sa dakbayan nga maoy nanguna sa pagsugat sa mga nahisgutan. (LVR)
