Dapitan City – Giobserbahan pa ang kahimtang sulod sa Tambalanan ang usa ka ulitawo human dunggaba sa gikainom niining uyoan didto sa Purok Mahayag, Barangay Aseniero, dakbayan sa Dapitan nahitabo sa niaging gabii.
Ang biktima giila sa kapolisan nga mao si Jesus Tacang Balanay, 37 anyos, samtang ang suspetsado mao usab ang uyoan nga si Orlando Gonzales Balanay, 68 anyos, minyo ug managsilingan sa maong dapit.
Base imbestigasyon sa Homicide Section sa kapolisan sa maong dakbayan nasuta nga nakig-inom ang biktima sa suspetsado sa usa ka tindahan nga nahimutang dili layo sa ilang mga balay.
Nagsugod sila og inom human sa ilang panihapon ug nagpadayon sa lawom nga kagabhion.
Gumikan sa gahum sa alak, nangalasbag ang duha nga misangpot sa nagkalandrakas nga mga estorya ug nautingkay ang karaan bikil nga nisangpot sa sumbagay.
Ang suspetsado nga wala kaagwanta milakaw paingon sa panimalay niini ug mibalik nga nagdala og kutsilyo ug dihang gisugat sa biktima, gihansakan kini kaduha sa tiyan ug uban bahin sa lawas hinungdan sa pagkahagba niini sa yuta.
Dihadiha gialsa dayon sa mga silingan ug gihatod ngadto sa Dr. Jose Rizal Memorial District Hospital sa dakbayan sa Dapitan.
Samtang ang suspetsado dali usab dayong nadakpan sa niresponde mga polis kinsa gibalhog na karon sa prisohan. (r.m)
