Sa interview sa RMN Malaybalay ngadto kang 2nd Lt. Valerie Mae Jequinto, Civil Military Operations (CMO)-Officer ug tigpama-ba sa 16th Infantry “Maglilingkod” Battalion sa Philippine Army, gibutyag niya nga dako og kausaban sa ginahimo nga operasyon sa mga kasundaluan ilabi na nga wala nay gasuporta sa mga rebeldeng NPA.
Kini rason sumala pa sa serye sa engkwentro nga natigayon ilabi na sa probinsya sa Bukidnon batok sa mga rebeldeng NPA.
Dugang pa ni Lt. Jequinto nga nahadlok na ang mga nahibiling miyembro sa NPA sa kasundaluan hinungdan sa ilang padayon nga pagdagan resulta sa pagpaningkamot sa gobyerno sa paghuman sa problema sa insurhensiya sa nasud.
Gisakopan sa Area of Operations sa 16th IB ang lungsod sa Malitbog, lakip na ang pipila ka mga lugar sa Manolo Fortich, ug Impasug-ong, Bukidnon.
Nanawagan karon ang kasundaluan ilabi na sa mga nahibiling miyembro sa NPA sa pagsurender balik sa malinawong pamuyo kauban ilang mga pamilya ug andam matud pa ang gobyerno pagtabang kanila.
Gipanawagan usab ang katawhan nga mutaho gilayon sa mga kasundaluan o sa kapulisan panahon nga adunay namatikdan nga paglihok sa mga armadong grupo sa NPA sa ilang mga lugar.
