Subling gipaklaro sa Land Transportation Franchising and Regulatory Board kon LTFRB Region 10 nga adunay transition period alang sa pag-modernisa sa Public Utility Vehicles ilawom sa modernization program.
Kini ang pamahayag sa LTRFB 10 human sa gihimong transport strike sa gurpong Starex Piston aron ipakita ang ilang hugot nga pagsupak sa PUJ’s modernization.
Sa interview sa RMN Malaybalay ngadto kang LTFRB 10 Regional Director Allan Guro, gibutyag niini nga adunay pay 3 ka tuig nga transition sa pagwagtang sa 15 anyos na nga mga jeepneys.
Gipasabot niini nga kung wala pa usay makahulip, dili usa kini ma phase out ilabina ug wala pay available sa market sa mga jeep nga ikapuli.
Matud ni Guro nga adunay pa usay series of dialogue ang ipahigayon tali sa ilang buhatan ug sa mga drivers ug operators.
Gipahayag usab sa regional director nga apil sa e-phase out ang mga multicab ug uban pang PUV nga nag edad na ug 15 anyos pataas.
Una nang gipahayag sa STAREX- PISTON Northern Mindanao nga gawas sa ilang pagsupak sa modernization program, ila usab nga gisupak ang gidusong house bill 4334 nga magpataas sa rekisitos sa pagkuha ug prangkisa.
Sa interview sa RMN ngadto kang Ringo Lago ang secretary general sa Starex-Piston gibutyag niini nga apil usab sa ilang gipalagan ang gitanyag nga sakyanan nga nagkantidad ug 800,000 hangtod 1.2 million pesos ug euro-4 nga nagkantidad ug 1.6 million.
