Davao City – Walay pagsupak ang pipila ka netizens sa nahimong pag-withdraw ni Presidente Rodrigo Duterte isip kandidato pagka-senador sa 2022 National Elections.
Pasado alas 4:00 sa hapon kagahapong adlawa (Disyembre 14, 2021) sa dihang miadto sa Commission on Election (COMELEC) Office si Presidente Duterte alang sa maong withdrawal.
Matud ni Jaque Martinez, usa ka netizen, mas maayo nga mupahulay na sa politika si Duterte diin nakaserbisyo na usab kini sa katawhan isip pangulo sa Pilipinas.
“Deserve nya mag-rest.. Kaysa magbaguod sa problema sa uban pero gina-bash gihapon,” kumento niini sa DXDC RMN Davao Facebook page.
Matud usab sa netizen nga si Grace Diana Aquino, girespito niini ang desisyon sa presidente diin mas maayo nga ma-enjoy nalang niini ang iyang pamilya ilabina nga edaran na usab kini.
“Sad pero ok ra oy kay para maka rest na siya. Enjoy enjoy na lang siya sa iyang mga apo. Tama na ang stressful work sa iyang edad,” kumento usab niini.
Samtang, kagahapong sa buntag, pormal usab nga nag-withdraw si Senador Christopher “Bong” Go sa iyang kandidatura pagka-presidente sa piniliay sunod tuig.
Sa statement ni Davao City Mayor Sara Duterte-Carpio kabahin sa lakang sa amahan ug Senador Go, gisaysay niini nga personal nga desisyon ang withdrawal sa kandidatura ug kinahanglan na lamang kining suportahan.
“The filing of candidacy and withdrawal is a personal decision. We can only support that decision,” pamahayag sa alkalde.
RadyoMaN Kirby Manzon
