Roxas City, Capiz – Nakahanda si Capiz Governor Tony del Rosario nga atubangon ang kaso nga ginpasaka sa iya ni PDP-Laban Provincial chair Mr. Essex Quintia sa Ombudsman.
Ini ang may kaangtanan sa gina-alegar paglapas sang gobernador sa Republic Act No. 3019 ukon Anti-Graft and Corrupt Practices Act in relation to Republic Act No. 9184 ukon Government Procurement Reform Act.
Sa interview sa gobernador, ginsiling sini nga ginaproteheran gid lamang niya ang ikaayo sang mga pumuluyo sang Capiz sang ginbulos bilang security guard sa Provincial Capitol, Capiz Government and Business Center kag Capiz Gymnasium ang mga security guard nga naghalin sa Perlite Security Agency nga ginapanag-iyahan naman sang iya utod nga si Carmen Andrade. Si Andrade ang nagapungko man bilang Sports and Business Consultant sang probinsya.
Sa matandaan, si del Rosario ang ginpasakaan sang kaso bangud nga ginaalegar wala nag-agi sa nagakaigo nga bidding process ang paghire sang nasambitan nga security guards halin sa security agency nga ginapanag-iyahan sang iya utod.
Suno pa sa gobernador, ginpang-islan sini ang anay nga mga security guard bangud nga sila ang indi epektibo sa ila trabaho kag masami nga naga-absent.
Ginpunto sini nga wala sang natabo nga kurapsiyon kag kampante siya nga masarangan niya nga sabton ang nasambitan nga reklamo.
